Аталған іс-шараға отандық және шетелдік қорғаныс-өнеркәсіп кешені, ғарыштық сала мен ақпараттық қауіпсіздік саласының кәсіпорындары, жетекші конструкторлық бюро мен ғылыми-зерттеу институттары қатысады деп күтілуде. Ұйымдастырушылардың айтуларына қарағанда, биылғы көрменің басты ерекшелігі – «KADEX-2018» көрмесінің құрамдас бөлігі ретінде «Қазақстандағы ғарыш күндері» халықаралық форумының өткізілуі. Бұл бастама Астана қаласының 20 жылдығына орай жоспарға енгізілген.
Көрмеде алғаш рет отандық және әлемдік космонавтиканың жетістіктеріне арналған жеке павильон ұсынылатын болады. Сондайақ әлемдік жетекші өндірушілердің қару-жарағы және әскери техника, әскери және азаматтық мақсаттағы өнімдері көрсетіледі.
Жалпы, «KADEX» көрмесі шартарапқа кеңінен танылған алаңға айналғандығын келесі деректер де растай түседі. Қазірдің өзінде «KADEX-2018» көрмесіне Ресей, Беларусь, Қырғызстан, Армения, Иран, БАӘ, Түркия, Иордания және басқа мемлекеттердің қорғаныс министрліктерінің бастамасымен 21 ресми делегация келетіндіктерін растап отыр. Бұған қоса, әлемнің АҚШ, Бразилия, Германия, Израиль, Үндістан, Қытай, Ресей тәрізді 26 елінен 294 кәсіпорын өз өнімдерін әкеледі. Сонымен қатар шетелдік 96 кәсіпорынның басшылары біздің елордаға келуге ниетті.
Демек, көрмеге келушілер қаруланудың озық үлгілерінен бастап, ақпараттық қауіпсіздікті қамтамасыз етуге дейінгі заманауи жетістіктерді көре алады.
Әлбетте кез келген мемлекеттің әлем алдындағы абырой-беделі Қарулы Күштерінің жай-күйімен анықталады. Бұл ретте Қазақстан Қарулы Күштерінің түбегейлі қалыптасып, өзгелерге көрсетері де көбейді. Оның ішінде сержанттардан бастап генералдарға дейін әскердің барлық саласы бойынша отандық оқу орындарында білім алуда. Қару-жарақтың жекелеген түрлері де елімізде жасалып, өндірістің тағы бір қыры өркендей түсті. Онымен қоса, әскери техника өнеркәсібінде Ресей, Израиль және Еуропа елдерімен тиімді байланыстар орнаған.
Қорыта айтқанда, шетелдіктер «KADEX-2018» көрмесін көруге де, өз өнімдерін көрсетуге де келеді. Ал жалпы, бұқара көрменің қызықтарын 25-26 мамыр күндері тамашалай алады.
Серік ӘБДІБЕК,
«Егемен Қазақстан»
